نصائح ستفيدك جدا خلال زيارتك التاريخية لدولة فلسطين: 1- اصحى تدخل فلسطين عن طريق معبر قلنديا الحدودي ... بتيجي عن طريق ال دي سي أو ... هيك أريح لراسك و أوجه برضو لأنك بتدخل مع كبارية البلد. 2- دولة فلسطين يا أبوحسين كثييير "زكفة " و صغيرة فما تخلي حدا يتفلسف عليك و يقلبلك دليل سياحي ... ببساطة دولتنا يحدها من الشمال بيرزيت ومن الجنوب عرابي تبع تأجير السيارات و من الشرق البالوع "جنب الدي سي أو" و من الغرب كازية الهدى اللي على طريق بيرنبالا ... خارج هاي الحدود لازم تكون حامل هويتك الخظرا أو في حالتك بطاقة ال في آي بي . 3 - تردش على اللي بقوللك تجيبش معاك الصمارط فون تبعك ... لأ .. جيبو عادي و أول ما تدخل دولتنا .. من على أي بسطة بتتناولك شريحة سيلكوم أو أورنج بعشرة شيكل و فيها رصيد. 4 - اصحى تعجقلي حالك في موضوع الحراسات و القصص هاي .. احنا الوضع عنا كثير أمان .. نص الشعب مفرغ على الأجهزة الأمنية و النص الثاني بدفع ضرايب عشان يدفع رواتب النص الأول ... و برضو اذا عجقت حالك في الموكب ممكن يوقفوك جماعة الضابطة الجمركية و هات حلها بعدين. 5 - ما تخاف من جودة منتجات دولتنا لأنها ممتاااازة كثير ... كلها صناعة اسرائيلية وفش فيها شغل مستوطنات ... الله وكيلك من تل أبيب و كله أصلي. 6 - اذا حابب تعمل شوبينغ ... في عنا سوق شعبي رهيييييب اسمه رامي ليفي ... انت بس رنلي و بنروح مع بعض. 7- اذا أجا في بالك تميل جهة الرام خلال زيارتك الشريفة أبو حسين ... ما بنصحك!! .. لأنه عمال البلدية مضربين و الوظع زبااااالة 8 - فش داعي تتعلملك كمن كلمة عربي لأنه الشعب عنا ثلاث ترباعه مفلسف و بعرف يطعم خرافه بكلمات انجليزي حتي لو مالهاش دخل. 9 - في مجموعة أسئلة مش لازم تجاوب عليها بالمرة و اذا حسيت حالك انضغطت بتقول "آي دونت سبيك عارابيك" ... زي شو الأسئلة.. أنا بحكيلك ... انت مدريدي و لا برشلوني؟؟ ... أو ما شالله بتشتغل رئيس ! بشرفك قديش بعطوك في الشهر ؟؟؟ ... أو شو أخبار ميشيل "ام حسين فش اشي عالطريق ؟؟ بدكوش تجيبولكو أخو لهالبنات؟؟ .. أو شو أخبار المصالحة ؟؟ ... او ليش هدول النصائح تسعة مش عشرة ؟؟؟ على كل حال .... صحيح انك مشكلة و زيارتك مشكلة ... بس انت و سياسات بلدك مش أكبر مشاكلنا ... احنا أكبر مشاكلنا. سيدي الريس أوباما ... قلة هلا !!!